မန္တလေးက ပြောက်ကျားအဖွဲ့ (၂) ဖွဲ့ မြို့ကိုစွန့်ခွာပြီလို့ကြေညာ၊ ရန်ကုန်ကို ကူညီမယ်လို့ဆို

မေ ၅၊ ၂၀၂၂

မန္တလေးက မြို့ပြပြောက်ကျားအဖွဲ့တွေဟာ မြို့ကို စွန့်ခွာသွားပြီလို့ တစ်ဖွဲ့ပြီးတစ်ဖွဲ့ ကြေညာချက်တွေ ထုတ်ပြန်လာပါတယ်။

ဒီနေ့မှာ မန္တလေး အနက်ရောင်သေမင်း ပြောက်ကျားအဖွဲ့နဲ့ Myanmar Revolution Rangers Force တို့က မြို့ကိုစွန့်ခွာသွားပြီလို့ ကြေညာထားတာပါ။

MRRF UG(mandalay)

” ကျွန်တော်တို့ Myanmar Revolution Rangers Forceအနေဖြင့် ရဲဘော်များ၏ လုံခြုံရေး တော်လှန်ရေး ရေရှည်တည်မြဲစွာဖြင့်တိုက်ပွဲဝင်နိုင်ရေးအတွက် မန္တလေးမြို့ကြီးအား စွန့်ခွာခဲ့လေပြီ ” လို့ ဖော်ပြထားပါတယ်။

သွေးကြောင်၍မဟုတ် ကြောက်၍မဟုတ် တော်လှန်ရေးရဲဘော်တွေနဲ့ ပူးပေါင်းပါဝင်မှုအားနည်းလှတဲ့အတွက် မန္တလေးမြို့ကြီးမှာဆက်လက်၍တော်လှန်နေလည်းမထူးတော့တာကြောင့် စွန့်ခွာရတာဖြစ်တယ်လို့လည်း MRRF UG(MDY) မြန်မာတော်လှန်ရေးရိန်းဂျားများအဖွဲ့ကဆိုပါတယ်။

အနက်ရောင်သေမင်း

မန္တလေးသို့/ ကျွန်ုပ်တို့ အနက်ရောင်သေမင်းအဖွဲ့မှ ဒီမြို့ကိုစွန့်ခွာခဲ့ပါပြီ။ ခင်ဗျားတို့ပျော်အောင်နေကြပါ။ အရက်ဆိုင်/ဘီယာဆိုင်/ ဘား/ကြိုက်ရာလုပ်နိုင်ပြီဖြစ်ပါသည်။ မငဲ့ပါနဲ့ ဘာဖြစ်လဲ ကိုယ်ပါသာပျော်တာပဲ ဟုတ်တယ်မို့လား” လို့ အနက်ရောင်သေမင်းအဖွဲ့က ပြောပါတယ်။

မန္တလေးကိုစွန့်ခွာလာတဲ့ ပြောက်ကျားအဖွဲ့တွေက ရန်ကုန်ကိုပြောင်းရွှေ့လာခဲ့တာဖြစ်ပြီး ရန်ကုန်ကပြောက်ကျားအဖွဲ့တွေကို ကူညီသွားမယ်လို့လည်း ဆိုပါတယ်။ #TNV